កុំចេះតែហ៊ានបើយើងគ្មានបច្ចេកទេស បានត្រឹមស្លាប់ខ្លួន

ថ្ងៃទី ២៧ ខែ មិថុនា ឆ្នាំ ២០១៨ម៉ោង ២១:១៨

ខេត្តបាត់ដំបង ៖ បុរសម្នាក់ក្នុងចំណោម២នាក់ ដែលបានតខ្សែភ្លើងលួចឆក់ត្រីនៅខាងក្រោយផ្ទះ ខុសបច្ចេកទេសត្រូវចរន្តអគ្គិសនីឆក់បណ្ដាលឲ្យរបួសធ្ងន់ តែបានស្លាប់នៅព្រឹកថ្ងៃទី២៧ មិថុនា ពេលបញ្ជូនទៅសង្គ្រោះនៅមន្ទីពេទ្យយោធា(ពេទ្យពពីរ)។ សមត្ថកិច្ចបានឲ្យដឹងថា បុរសដែលស្លាប់ឈ្មោះ ង៉ែត ប៊ុនរ៉េត អាយុ៤៩ឆ្នាំ នៅក្រុមទី១៣ ភូមិអូរតាគាំ១ សង្កាត់ទួលតាឯក ក្រុងបាត់ដំបង។ ជននេះ និងអ្នកភូមិម្នាក់ទៀតឈ្មោះលុច សម្ផស្ស ភេទប្រុស អាយុ២២ឆ្នាំ បានតខ្សែចរន្តអគ្គិសនីយកទៅឆក់ត្រី នៅវាយស្រែខាងក្រោយផ្ទះនៅវេលាម៉ោងជាង១០យប់ ថ្ងៃទី២៦ មិថុនា តែទំនងកាន់ចំមុខដំណខ្សែភ្លើង ទើបឆក់តែម្ដង។

បើតាមក្រុមគ្រួសារបានប្រាប់ថា ពេលឆក់ភ្លាមជនរងគ្រោះគ្រាន់តែរងរបួស ហើយក៏បានដឹកទៅកាន់មន្ទីរពេទ្យយោធា(ពេទ្យពពីរ) ប៉ុន្តែអកុសលដោយសារស្ថានភាពធ្ងន់ធ្ងរពេក ជនរងគ្រោះបានស្លាប់នៅព្រឹកថ្ងៃទី២៧ មិថុនា នៅមន្ទីរពេទ្យខាងលើនេះទៅ។ ជាមួយនឹងការស្លាប់នេះ ភរិយាជនរងគ្រោះគឺអ្នកស្រី មុត ស៊ីណា បានបំភ្លឺប្រាប់សមត្ថកិច្ចថា នៅថ្ងៃទី២៦ មិថុនា ប្ដីរបស់ខ្លួន និងឈ្មោះ លុច សម្ផស្ស ពិតជាបានតខ្សែភ្លើងចេញពីផ្ទះឆក់ត្រីនៅក្នុងស្រែខាងក្រោយផ្ទះជាមួយគ្នាមែន។ គាត់និយាយថា នៅវេលាម៉ោង២រំលងអាធ្រាត្រ ឈានចូលថ្ងៃទី២៧ មិថុនា ស្រាប់តែឈ្មោះ សម្ផស្ស បានរត់មកប្រាប់ថា ប្ដីរបស់ខ្លួនត្រូវខ្សែភ្លើងឆក់ដួលក្នុងស្រែ។ ឮដូច្នេះគាត់ក៏នាំគ្នារត់ទៅមើល ហើយក៏បានបញ្ជូនទៅសង្រោះនៅមន្ទីរពេទ្យពពីរភ្លាមៗដែរ។

លុះព្រឹកថ្ងៃទី២៧ មិថុនា ប្តីរបស់ខ្លួនក៏បានស្លាប់តែម្ដង។ សមត្ថកិច្ចជំនាញក៏បានទៅពិនិត្យសពជនរងគ្រោះ និងកន្លែងកើតហេតុភ្លាមៗដែរ ក្រោយពីទទូលបានព័ត៌មាននេះ រួមទាំងបានសួរនាំឈ្មោះ លុច សម្ផស្ស ដែលបានចូលរួមប្រព្រឹត្តបទល្មើសឆក់ត្រីនេះផងដែរ។ ឈ្មោះ លុច សម្ផស្ស បានប្រាប់សមត្ថកិច្ចថា នៅយប់នោះខ្លួន និងឈ្មោះ រ៉េត ពិតជាបានតខ្សែភ្លើងលួចឆក់ត្រីក្នុងស្រែខាងក្រោយផ្ទះមែន។ យុវជនរូបនេះបានបញ្ជាក់ថា ពេលកំពុងឆក់ត្រី ស្រាប់តែឈ្មោះ រ៉េត ត្រូវចរន្តអគ្គិសនីឆក់គាត់ដួលក្នុងស្រែ ហើយខ្លួនក៏ស្ទុះទៅជួយរួចហើយក៏រត់ទៅហៅប្រពន្ធគាត់ និងអ្នកភូមិឲ្យជួយដឹកទៅសង្គ្រោះ នៅមន្ទីរពេទ្យភ្លាមៗតែម្ដងទៅ។ សមត្ថកិច្ចបាននិយាយថា ឧប្បតិហេតុនេះបានកើតឡើងដោយការ ប្រព្រឹត្តបទល្មើសលួចតខ្សែភ្លើងឆក់ត្រី។

បើតាមការពិនិត្យរបស់មន្ត្រីជំនាញ ជនទាំង២នាក់នេះបានប្រថុយប្រថានដែលខ្លួនគ្មានជំនាញក្នុងការតខ្សែចរន្តអគ្គិសនីអូសចេញពីផ្ទះរាប់សិបម៉ែត្រយកទៅឆក់ត្រីក្នុងស្រែ ទើបភ្លាត់ស្នៀតឆក់ខ្លួនឯងស្លាប់បែបនេះ។ មន្ត្រីជំនាញបានធ្វើការសន្និដ្ឋានជាបឋមថា ជនរងគ្រោះពិតជាអាចស្លាប់ដោយសារត្រូវចរន្តអគ្គីសនី ឆក់មែន ដែលពួកគេបានតខុសបច្ចេកទេស។ នេះជាប្រព្រឹត្តបទល្មើសដ៏ប្រថុយប្រថានបំផុត ដែលគួរតែចៀសវាង។

កុំចេះតែហ៊ានបើយើងគ្មានបច្ចេកទេស បានត្រឹមស្លាប់ខ្លួន

Post a Comment

0 comments